Verschidden Bitzarten
Hutt Dir schonn e schéine Stoff fir Är Ridoen ausgewielt? Dann hutt Dir Iech sécher scho Gedanke gemaach, wéi d‘ Rido oder de Store am Raum wierke soll. Déi erwënscht Atmosphär verstäerkt Dir am beschten mat der passender Bitzart. An do ginn et e puer Méiglechkeeten – vun der Öse iwwer de flämesche Pli bis zum Welleband. Jee no Stoff, Aart wéi et opgehangen gët, an Ärem perséinlechen Ariichtungsstil ass déi passend Bitzart dat Besonnescht fir Äer Ridoen a Storen. Wéi och ëmmer Dir Iech entscheet, mir fabrizéieren alles vun Hand an eisem hauseegenen Bitzatelier.
Ösen & Schlaufen
Ösen
Grouss Metall- oder Plastikréng ginn bei dëser Bitzart direkt an de Stoff ageaarbecht. Dës Method ass besonnesch praktesch a modern, well d’Ridoen domat liicht iwwer d’Stang rutschen.
Schlaufen
Déi méi informell Variant si Stoffschlaufen. Si ginn um ieweschten Enn vun der Rido ugbitzt an kënnen esou direkt op d’Stang gezunn ginn.
Flämesche Pli
Dëst ass eng speziell Aart vu Faalekonfektioun fir Ridoen. Si gët de Stoffer eng elegant a strukturéiert Optik. Dobäi ginn déif, gläichméisseg Plien laanscht den ieweschten Bord vun der Rido ageaarbecht. D’Plien falen a gläichméissegen, groussen Wellen a verleeën der Rido en voluminéist an edelt Ausgesinn. Ob et einfach, duebel oder dräifach gebitzten Faalen sinn, hänkt vum gewielte Stofft, Äerem Ariichtungsstil a Goût of.
Iwregens: Wat méi Plien, emsou méi Stofft. Eng Rido mat zwee oder dräi Plien huet ausserdem méi Volumen a fällt méi gläichméisseg.
Einfache Pli
Einfach Plien ënnersträichen e modernen Ariichtungsstil a passen fir all Stoffer. Ausserdeem si se gutt gëeegent fir déck Stoffer, wéi Samett a Blackout-Stoffer vir d‘ Verdonkelung.
Duebele Pli
Dës Ausféierung passt jee no Stoff souwuel zu klassesche wéi och zu modern gestaltete Räim. Gëeegent ass si fir all Aarte vu Stoffer, vun de rengsten bis hin zu Stoffer, déi d‘ Räim verdonkelen.
Dräifache Pli
Dëst ass déi luxuriéist Ausféierung, déi e klassesche Wunnstil ënnersträicht. Den drëtte Pli verstäerkt de Volumen a verbessert de Fall vum Stoff. Si ass allerdéngs net fir déck Stoffer, wéi Samett oder Blackout- Stoffer gëeegent.
„Wave“ – d’Welleband
D’Wave-Bitzart ass eng modern an elegant Aart vu Ridosgestaltung. D’Rido fällt a gläichméissegen, liicht geschwongene Wellen. D’Welleband passt exzellent zu engem minimalisteschen Ariichtungsstil, well et eng schlicht, elegant Ästhetik ausstrahlt.
Gëeegent ass dës Bitzart fir all Aarte vu Stoffer. Si kann souwuel fir transparent Storen wéi och fir bléckdicht Ridoen benotzt ginn. Allerdéngs brauch d’Welleband Plaz; eréischt ab enger Déift vu 20 cm kënne dës Ridoen montéiert ginn. D’Regelméissegkeet tëscht de „Wellen“ geléngt, well d’Glider vun de Ridoen duerch eng Schnouer matenee verbonnen sinn.
Ënnerkant oder Saam
An der Reegel ginn Ridoen ënnen mat engem Saam gebitzt. D’Héicht vum Saam orientéiert sech um agesate Stoff an dorun, wéi eng Wierkung d‘ Rido soll erzielen. Ofhängeg vun der Héicht vum Saam fält d’Rido anescht. Wat méi héich de Saam, emsou méi klassesch wierkt d’Rido. E schéine Fall entsteet och bei Ridoen, déi e Bläiband ugebitzt hunn.
